Unabii wa Yesu kuhusu hekalu la Yerusalemu-Sehemu 2 [Askofu Sylivester Gamanywa]

Biblia imeandika mengi yanayotuonya kujihadhari na kujiweka tayari kukabiliana na matukio ya kinabii yaliyotabiriwa kutokea katika kipindi cha siku za mwisho ambacho sisi ndio kizazi husika.

Jumapili iliyopita nilitimiza ahadi yangu kwa kuichambua “Kalenda ya kinabii” ambayo ni baadhi ya matukio ya kinabii yanayotarajiwa kutimia wakati huu, kwa maana katika kizazi hiki kilichopo hivi sasa. Ninasema kizazi hiki kwa sababu kalenda ya siku za mwisho ilianza rasmi tangu siku ya Pentekoste (MDO. 2:14-18) mpaka Yesu atakapolinyakua kanisa lake kutoka duniani. (YH.14:2-3)

Mwishoni mwa mwaka jana tumeshuhudia suala la mji wa Yerusalemu lilivyochukua nafasi kubwa katika Umoja wa Mataifa ambapo mataifa yamegawanyika kuhusu hali ya mgogoro wa Mashariki ya Kati baina ya Israeli na Palestina kuhusu mji wa Yerusalemu. Macho ya jumuiya ya kimataifa hivi sasa yameelekezwa kwa Israeli kuliko ilivyokuwa kabla huko nyuma.

Haya yanahusiana kwa vipi na unabii wa Yesu Kristo kuhusu Israeli na Yerusalemu? Hii ni mojawapo ya ishara ya tishio kuibuka vita kali Mashariki ya Kati ambayo itahusisha mataifa makubwa ya Ulaya pamoja na mataifa ya kiarabu yanayoizunguka Israeli.

Baadhi ya mambo niliyochambua jumapili iliyopita ni kama ifuatavyo:

UNABII KUHUSU “KUNYAKULIWA KWA KANISA”

Unabii wa siku za mwisho unatuonya kuhusu dalili za matukio ambayo yanatarajiwa kutokea wakati wowote kuanzia hivi sasa ambapo baadhi yake ni pamoja na; “unyakuo wa kanisa na kipindi cha dhiki kuu kilichotabiwa na nabii Danieli pamoja Yesu Kristo mwenyewe.

Kwa habari ya unabii kuhusu unyakuo wa kanisa tunasoma ahadi ya Yesu Kristo mwenyewe alipotoa ahadi maalum ya kwenda kuandaa mahali na kisha kurudi tena kuwachukua wanafunzi wake:

“Nyumbani mwa Baba yangu mna makao mengi; kama sivyo, ningaliwaambia; maana naenda kuwaandalia mahali. Basi mimi nikienda na kuwaandalia mahali, nitakuja tena niwakaribishe kwangu; ili nilipo mimi nanyi mwepo.” (YH.14:2-3)

UNABII KUHUSU “KIPINDI CHA DHIKI KUU DUNIANI”

Unabii unapotaja habari ya kipindi cha dhiki kuu, unalenga “dhiki tofauti na dhiki nyingine zote ambazo zimekuwepo duniani katika vizazi vyote vilivyokwisha kutangulia." Kwa maneno ya Yesu Kristo mwenyewe tunasoma ya kwamba:

“Kwa kuwa wakati huo kutakuwapo dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe. Na kama siku hizo zisingalifupizwa, asingeokoka mtu ye yote; lakini kwa ajili ya wateule zitafupizwa siku hizo.” (MT.24:21-22)

Soma vizuri maandiko kama “dhiki kubwa” ambayo “Haijatokea namna yake tangu mwanzo wa ulimwengu hata sasa” na wala “haitakuwepo kamwe”! Haya ni maneno ya Yesu mwenyewe wala si manabii wengine.

Kwanini ni dhiki tofauti kuliko dhiki nyingine zote? Kwa sababu itakuwa imebeba ghadhabu ya Mungu dhidi ya uasi unaotarajiwa kushika hatamu wakati wa kipindi cha dhiki kuu.

JE! UNYAKUO UTAFANYIKA LINI: KABLA AU BAADA YA DHIKI KUU?

Kumekuwepo malumbano sugu baina ya kambi za nadharia kuhusu kanisa kunyakuliwa kabla au baada ya dhiki kuu. Kambi moja inaaamini na kutafsiri kwamba kanisa la Kristo litakuwepo kwenye dhiki kuu. Kambi ya pili inakanusha mtazamo huu na kufundisha kwamba kanisa litanyakuliwa kabla ya kipindi cha dhiki kuu kuanza.

Uchunguzi wangu katika maandiko na tafsiri yake kuhusu unyakuo na kipindi cha dhiki kuu, nimebaini ya kwamba, fundisho la "kanisa kunyakuliwa kabla ya dhiki kuu" lina ushahidi wenye ushawishi mkubwa kimaandiko. Nitaeelezea baadhi ya ushahidi huo kama ifuatavyo:

UNABII WA DHIKI KUU UNAIHUSU ISRAELI NA SIO KANISA

Sababu kubwa ya Kambi ya nadharia inayofundisha kwamba kanisa litakuwepo wakati wa dhiki kuu ni tafsiri isiyo sahihi ya kutokutambua uwepo wa taifa la Israeli katika siku za mwisho. Ni mtazamo hasi wa kutafsiri kinyume kwa kudai “Kanisa lilichukua nafasi ya Israeli”! Na mpaka hivi sasa, kambi hii hailitambui taifa la Israeli lililopo hivi sasa hapo Mashariki ya Kati!

Hata hivyo tukiyasoma maandiko ya unabii wa Yesu Kristo kuhusu dhiki kuu inayotarajiwa kutokea hailitaji kanisa na badala yake mlengwa mkuu ni Israeli:

“Bssi mtakapoliona chukizo la uharibifu, lile lililonenwa na nabii Danieli, limesimama katika patakatifu (Asomaye na afahamu), ndipo walio katika Uyahudi na wakimbilie milimani; naye aliye juu ya dari asishuke kuvichukua vitu vilivyomo nyumbani mwake; wala aliye shambani asirudi nyuma kuichukua nguo yake. Ole wao wenye mimba na wanyonyeshao siku hizo! Ombeni, ili kukimbia kwenu kusiwe wakati wa baridi, wala siku ya sabato.” (MT.24:15-20)

Maneno kama “Walio katika Uyahudi na wakimbilie milimani..” na “ombeni kukimbia kwenu kusiwe siku ya Sabato” yote yanadhihirisha kwamba tukio la chukizo la uharibifu litafanyikia mjini Yerusalemu na wanaoagizwa kukimbilia milimani ni Wayahudi na sio kanisa.

Makala haya ya kinabii yataendelea toleo lijalo. Kama umesoma post hii nijulishe kwa ku-like na ukiweza wasambazie marafiki zako. Nakusudia kujibu hoja zote pinzani kwa ushahidi wa maandiko na tafsiri makini zisizo na utata ili “asomaye na afahamu”. Ubarikiwe sana.

Mwandishi; Askofu Sylivester Gamanywa